ಹೆತ್ತವಳು

ಹತ್ತು ದೇವರಿಗಿಂತ ಹೆಚ್ಚು, ನನ್ನ ಹೆತ್ತವಳು

ಬಂಧುಗಿಂತ ಹೆಚ್ಚು, ನನ್ನ ಹೊತ್ತು ಹೆತ್ತವಳು

ನಾ ಹೀಗೆ ಇರಬಯಸುವೆ ಅವಳ ಮಗನಾಗಿ

ಅವಳ ಮಮತೆಗೆ ನಾನಾದೆ ಮೂಗನಾಗಿ

ಇರುವೆ ಎಂದೂ ನನ್ನ ಹೆತ್ತವಳ ಸೇವಕನಾಗಿ

ಎಂದು ಬೇಡಿದೆ ಕಾಣದ ದೇವರ ದೀನನಾಗಿ

ಲೋಕಕ್ಕೆಲ್ಲಾ ಕಾಣುವ ನನ್ನೀ ತನುಮನವೆಲ್ಲಾ

ನವಮಾಸದಲಿ ನನಗೆ ಕೊಟ್ಟ ಕೊಡುಗೆ ಇದೆಲ್ಲಾ

ಎಂಥದ ಕಷ್ಟದ ಕಗ್ಗತ್ತಲಿನಲ್ಲೂ ನನ್ನ ಮರೆಯಲಿಲ್ಲಾ

ಈ ಉಡುಗೊರೆಯ ನಾನು ಮರೆಯುವುದಿಲ್ಲಾ

ಹಸುವಿನ ಕರು ಕೂಗುವುದು 'ಅಮ್ಮಾ' ಎಂದು

ಹಾರುವ ಹಕ್ಕಿಯ ಚಿಲಿಪಿಲಿ 'ಅಮ್ಮಾ' ಎಂದು

ಚಂಗನೆ ಹಾರುವ ಜಿಂಕೆಮರಿ ಕೂಗು 'ಅಮ್ಮಾ' ಎಂದು

ಸದಾ ನಾನೀಗಲೂ ಕೂಗುವೆ 'ಅಮ್ಮಾ' ಎಂದು